l

lifestyle

Կայացավ «Մեգամոլ Արմենիայի» շնորհանդեսը

Տեղի ունեցավ երկար սպասված «Մեգամոլ Արմենիայի» շնորհանդեսը: Գայի պողոտա 16 հասցեում բացված այս մոլն ամենամեծն է Հայաստանում: Ռեկորդակիր շատրվան, տասնյակ սիրված բրենդերի սրահներ, Անդրկովկասի ամենամեծ խաղահրապարակը, ամենամեծ Երևան սիթին ու սա դեռ ամենը չէ: Բոլոր մանրամասները կիմանաք ԿամոԲլոգում:

  • Kamo Tovmasyan

«Մեգամոլ Արմենիան» Հայաստանի ամենամեծ մոլն է, որի կառուցման հիմքում ընկած է հայկականության գաղափարը։ Այն ընդարձակ ու լուսավոր առեւտրի կենտրոն է, որտեղ հայկական ավանդական ճարտարապետական էլեմենտները համակցված են ժամանակակից աշխարհի արդի եւ կրեատիվ լուծումներին։ Յուրաքանչյուր մանրուք նախագծելիս եւ իրականացնելիս առավելապես ուշադրություն է դարձվել դրա արմատներին եւ նշանակությանը։ Շենքի կառուցումն իրականություն է դարձել տեղի եւ դրսի պրոֆեսիոնալ մասնագետների համատեղ աշխատանքի արդյունքում։ Այն ի սկզբանե կառուցվել է որպես մոլ, ինչի արդյունքում հարմարեցված է մոլի միջազգային չափանիշներին եւ առավելապես ծառայելու է այցելուների հարմարավետությանը։ 

Ավելի քան 98.000 ք.մ. տարածք զբաղեցնող մոլը բաղկացած է 6 հարկերից, որոնցից 3-ը ստորգետնյա են։ Այն աչքի է ընկնում իր հանգիստ, միեւնույն ժամանակ հարուստ գույների համադրությամբ` սպիտակ, ոսկեգույն, դարչնագույն։ Մոլը բրենդային է եւ այնտեղ ներկայացված են տեղական եւ միջազգային շուրջ 100 բրենդեր, որոնք ավելի հաճելի կդարձնեն հաճախորդների գնումները։

Ի դեպ, մոլի բոլոր բրենդային խանութները բացված են նոր եւ ամենամեծ կոնցեպտներով։ Այցելուները կկարողանան գտնել բոլոր տարիքի եւ հետաքրքրություններին համապատասխանող խանութ- սրահներ։ Բացի խանութ-սրահներից մոլում գործելու է նաեւ Անդրկովկասի ամենամեծ խաղահրապարակը, կինոթատրոն, ռեստորան-սրճարաններ, ֆուդկորտ։ Այն ունի մեգա կայանատեղի, ինչպես նաեւ անվճար տաքսի ծառայություն, որը հաճախորդին խանութներից կտեղափոխի մուտքի մոտ։

Մոլում ներկայացված է նաեւ Մինաս Ավետիսյանի «Գիշեր» որմնանկարը /1973թ./։ Որմնանկարը վերականգնվել է իտալացի մասնագետների կողմից` Ֆաբրիցիո Իակոբինիի գլխավորությամբ։ Որմնանկարը համարվում է պատմամշակութային հուշարձան եւ Հայաստանի Հանրապետության սեփականությունն է: Լինելով հայկական ոճով կառուցված մոլ` այն առավելապես կնպաստի տուրիզմի զարգացմանը եւ կդառնա զբոսաշրջիկների սիրված վայր, Հայաստանի այցեքարտերից մեկը։

Magic land. Անդրկովկասի ամենամեծ խաղահրապարակը

Մոլում գործում է Անդրկովկասում ամենամեծ խաղահրապարակը, որն ընդհանուր առմամբ ունի շուրջ 9000 ք.մ.։ Այստեղ ընդգրկված են այնպիսի խաղեր, որոնք նույն ձեւաչափով որեւէ այլ տեղում հնարավոր չի լինի գտնել։ Խաղահրապարակում կա Formula 1 կարտինգ, որի մրցուղու երկարությունը շուրջ 1.2 կմ է։ Այստեղ հնարավոր կլինի վարել մինչեւ 65 կմ/ժամ արագությամբ մեքենաներով։ Խաղահրապարակում կա մագլցման պատ, ինչպես նաեւ 3 հարկանի պարանների քաղաք։ Իսկ ահա 9 հարկանի լաբիրինթն իր չափսերով այնքան մեծ է, որ ներսում նույնիսկ սանհանգույցներ կան երեխաների համար։ Օլիմպիական տրամբոլին բատուտը կծառայի ինչպես երեխաների համար, այնպես էլ ակտիվ սպորտի սիրահարներ մեծահասակների համար եւ նրանց համար կփոխարինի ֆիթնեսը։

 

Կինոթատրոն. Տեխնիկական նորագույն հագեցվածությամբ 

           Մոլում գործում է Սինեմա սթար կինոթատրոն` ընդհանուր 4 դահլիճներով, որոնցից 3-ն ունեն 175 նստատեղ, իսկ 4-րդը vip սրահն է։ Բոլոր դահլիճներն ունեն տեխնիկական նորագույն հագեցվածություն, միջազգային ստանդարտներին համապատասխան գերհարմարավետ աթոռներ։

Ավտոկայանատեղի. Smart համակարգով 

Մոլի -1, -2, -3 հարկերում գործում է շուրջ 1000 մեքենայի համար նախատեսված ավտոկայանատեղի։ Այստեղ ներդրված է smart համակարգ, որն այցելուներին հնարավորություն կտա լուսացույցի կարմիր եւ կանաչ գույների օգնությամբ հեշտությամբ կողմնորոշվել տարածքում։ Կայանատեղիի բոլոր կողմերում կան վերելակներ, իսկ ահա մեջտեղի հատվածում նաեւ շարժասանդուղք։

Ֆուդկորտ. Ամբողջ աշխարհի համերը 

Ֆուդկորտը նախատեսված է շուրջ 750 մարդու համար։ Այն հագեցած է յուրաքանչյուր տիպի սննդատեսակով` ներկայացնելով ամբողջ աշխարհի համերը։ Ֆուդկորտում հնարավոր է գտնել ինչպես արագ սննդի կետեր, այնպես էլ առողջ սնունդ։

Շատրվան. գրանցված Գինեսի ռեկորդների գրքում 

Առեւտրի կենտրոնի մուտքի մոտ այցելուներին ողջունում է թվային եւ լուսային լուծումներով հագեցած գեղեցիկ շատրվանը, որն ընդգրկված է գինեսի ռեկորդների գրքում։ Այն ջրի եւ ներդված համակարգի միջոցով կարողանում է արտապատկերել նկարներ, բառեր, նախշեր։ Այն կծառայի բոլոր հաճախորդների համար։ Յուրաքանչյուրը կկարողանա շատրվանի վրա գրել իր ցանկությունը, բարեմաղթանքը կամ շնորհավորանքը։

  

Կամուրջներ` սփյուռքի, ծաղիկների, սիրահարների, երազանքների եւ երաժշտության 

Քանի որ մոլի ստեղծման կոնցեպտի հիմքում ընկած է հաճախորդների հարմարավետությունը, տարածքում կան կամուրջներ, որոնք ունեն իրենց անվանումները` Սփյուռքի, Ծաղիկների, Սիրահարների, Երազանքների եւ Երաժշտության, որտեղ ի դեպ մշտապես կհնչեն հայ երգիչների եւ կոմպոզիտորների ստեղծագործությունները։ Այստեղ վաճառվելու են համերգի, օպերայի եւ բալետի, թատերական ներկայացումների տոմսեր։ Կամուրջներն առաջին հերթին կօգնեն այցելուներին հեշտ կողմնորոշվել մեգա տարածքում։

Ամենամեծ Երեւան սիթին

 Մոլում գործելու է Հայաստանի ամենամեծ Երեւան սիթի սուպերմարկետը, որն ունի ավելի քան 8000 ք.մ. տարածք։ Այնտեղ տեղում կբովվի սուրճ, կպատրաստվի կոնֆետներ, գարեջուր, պանրի մի քանի տեսակ, կաթնաշոռ։ Գնորդների աչքի առջեւ կթխվի նաեւ առանց գլյուտենի հաց, կգործի թոնրատուն։

 

back-top