EXCLUSIVE! Հայկական տաղավարի պաշտոնական բացումը Վենետիկի 60-րդ միջազգային բիենալեի շրջանակում:

Fastex-ն ուրախ է աջակցություն ցուցաբերել հայկական տաղավարին Վենետիկի 60-րդ միջազգային բիենալեի շրջանակում՝ խթանելով արտերկրում հայ մշակույթի պատշաճ ներկայացումն ու հանրահռչակումը:

Hayk Shabanyan
Kamo Tovmasyan

Վենետիկի 60-րդ հոբելյանական արվեստի բիենալեում, որը մեկնարկվեց այսօր և կամփոփվի նոյեմբերի 24-ին, Հայաստանի Հանրապետությունը ներկայացնում է փարիզաբնակ հայ արվեստագետ Նինա Խեմչյանի բազմաշերտ մուլտիմեդիա նախագիծ՝ «Արձագանք»-ը։

Տաղավարի համակազմակերպիչն ու գլխավոր հովանավորն է Գաֆէսճեան արվեստի կենտրոնը (ԳԱԿ)։ Տաղավարի աջակիցներից է նաև FASTEX ընկերությունը, ում հրավերով էլ մենք ներկա գտնվեցինք և հնարավորություն ունեցանք լուսաբանել այս կարևոր իրադարձությունը:

Ազգային տաղավարի համադրողն է ԳԱԿ ցուցադրությունների գծով տնօրեն Արմեն Եսայանցը։ Տաղավարի կոմիսարն է ՀՀ կրթության, գիտության, մշակույթի և սպորտի նախարարությունը։

2024 թվականի Վենետիկի արվեստի բիենալեի շրջանակում Հայաստանի ազգային տաղավարի առանցքում են հայ միջնադարյան մշակութային ժառանգության և համամարդակային տարաշերտ հոգևոր սկզբունքների խաչմերուկում հատվող գաղափարները, որ վերաիմաստավորվում են արդիականության համատեքստում։

Նինա Խեմչյանի «Արձագանք»-ը բաղկացած է երկու ծավալուն ինստալյացիաներից․ երկու միմյանց ոչ միայն լրացնող, այլև իրարից սերող բաղադրիչներ։

Հայաստանի ազգային տաղավարի կենտրոնական ինստալյացիան բաղկացած է օդում, կարծես անկշռության մեջ կախված տասնմեկ երկնագույն կերամիկական գնդերից։ Այս քանդակներից յուրաքանչյուրի վրա ոսկե տառերով պատկերագրված է Մեսրոպ Մաշտոցի ապաշխարության տասնմեկ շարականներից մեկը։ Ինստալյացիայի անբաժան մաս է կազմում այս շարականների ակապելլա կատարումը Հասմիկ Բաղդասարյան-Դոլուխանյանի կողմից, որը ոգեշնչել է Նինա Խեմչյանին։ Հայաստանի ազգային տաղավարի կարևոր բաղկացուցիչ է նաև Նինա Խեմչյանի «Յոթ մահացու մեղքեր» աշխատանքը՝ 50 մետր երկարությամբ ամբողջական թղթե մոնումենտալ ստեղծագործություն, մարդկության մեղքերի արդի պատկերագրությամբ մի կոթողային գլանակ։