Երևանում կայացավ Հրաչ Քեշիշյանի «Մի գդալ սեր» ֆիլմի պրեմիերան

Քիչ առաջ ավարտվեց ռեժիսոր Հրաչ Քեշիշյանի «Մի գդալ սեր» նոր գեղարվեստական ֆիլմի փակ պրեմիերան։ «Կինոմոսկվա»-ում կայացած երեկոն մեկնարկեց կարմիր գորգի արարողությամբ, որին հաջորդեց ֆիլմի առաջին փակ ցուցադրությունը։

Հայկ Շաբանյան
Կամո Թովմասյան

Mitoyan Production & HK Production ընկերությունների համատեղ արտադրության «Մի գդալ սեր»-ը սիրո, ընտրության, հայկական խոհանոցի և սեփական արմատները նորովի բացահայտելու մասին պատմություն է։

Ֆիլմի կենտրոնում Բոստոնում հաջողության հասած խոհարար Արեգն է, որը նոր ներշնչանք փնտրելով՝ գալիս է Հայաստան։ Այստեղ նա հանդիպում է Լուսինին, և այդ հանդիպումը փոխում է նրա կյանքի ընթացքը։ Սերը, հայկական խոհանոցն ու մի շարք անսպասելի բացահայտումներ Արեգին կանգնեցնում են ընտրության առաջ՝ վերադառնալ իր նախկին, արդեն կայացած կյանքին, թե՞ մնալ և ամեն ինչ սկսել նորից։

Գլխավոր դերերում հանդես են գալիս Անի Խաչիկյանն ու Ներսես Ավետիսյանը։ Դերասանական կազմում են նաև Էդգար Դամաթյանը, Արսեն Գրիգորյանը, Մարջան Ավետիսյանը, Լևոն Հարությունյանը, Մինաս Ասրյանը և Եվա Զոհրաբյանը։ Ֆիլմում մասնակցում են նաև Նորա Արմանին և Աննալիս Բասսոն, հատուկ մասնակցությամբ՝ Նազենի Հովհաննիսյանը, իսկ հատուկ հրավերով՝ Ռաֆայել Երանոսյանը։

«Մի գդալ սեր»-ի ռեժիսորն ու պրոդյուսերներից մեկը Հրաչ Քեշիշյանն է, մյուս պրոդյուսերը՝ Արման Միտոյանը։ Սցենարի հեղինակը Արտակ Ալեքսանյանն է։ Ֆիլմը ստեղծվել է Փոփի Ջ. Անդերսոնի գրքի հիման վրա։

Ֆիլմի երաժշտական ձևավորման մեջ ընդգրկված են Հայկոյի, Արման Պարսամյանի և Ռոլանդ Գասպարյանի ստեղծագործությունները։

Պրեմիերային ներկա էին ֆիլմի ստեղծագործական և դերասանական կազմի ներկայացուցիչները, ինչպես նաև հայկական շոու-բիզնեսի, մշակույթի և մեդիա ոլորտի բազմաթիվ հյուրեր։