NeuroKlinik նյարդաբանության գերմանական կենտրոնը նշեց 1-ամյակը

Կենտրոնի հիմնադիրն է Բեռլինի Charité համալսարանական կլինիկայի բժշկական գիտությունների դոկտոր, ՀՀ-ում Գերմանիայի դեսպանատան վստահված բժիշկ Սարգիս Աբրահամյանը, ով իր միջազգային փորձն ու գիտելիքները բերել է Հայաստան՝ ստեղծելով մի վայր, որտեղ հիվանդները կարող են ստանալ համալիր ախտորոշում և բուժում՝ առանց տարբեր բժշկական կենտրոններ այցելելու անհրաժեշտության։

NeuroKlinik-ի գլխավոր առանձնահատկությունն այն է, որ այստեղ նյարդաբանությունը համակցված է հարակից կարևոր բժշկական ուղղությունների հետ։ Միևնույն կենտրոնում գործում են նյարդաբանական, սրտաբանական, ռադիոլոգիական, նյարդավերականգնողական, հոգեբանական և հոգեսոմատիկ բժշկության ծառայություններ՝ ապահովելով հիվանդի առողջական վիճակի բազմակողմանի գնահատում և արդյունավետ բուժում։

Նյարդաբանական բազմաթիվ հիվանդությունների արդյունավետ բուժումը հաճախ պահանջում է ոչ միայն ճշգրիտ ախտորոշում, այլև տարբեր մասնագետների համատեղ աշխատանք։ Հենց այդ պատճառով NeuroKlinik-ի կարևոր սկզբունքներից է ուժեղ և վստահելի բազմապրոֆիլ մասնագիտական թիմի ձևավորումը։ Այստեղ նյարդաբանները, սրտաբանները, հոգեբանները, վերականգնողական մասնագետներն ու մյուս բժիշկները համատեղ մշակում են յուրաքանչյուր բուժառուի բուժման ռազմավարությունը՝ ապահովելով համակարգված, անհատական և առավել արդյունավետ մոտեցում։

Կենտրոնի թիմը կազմված է Գերմանիայում կրթություն ստացած և վերապատրաստված մասնագետներից, որոնք աշխատում են միջազգային ուղեցույցներին համապատասխան՝ կիրառելով ժամանակակից ախտորոշիչ մեթոդներ և բուժման արդյունավետ մոտեցումներ։

NeuroKlinik-ում իրականացվում են նյարդաբանական լայնածավալ հետազոտություններ՝ ներառյալ էլեկտրանեյրոմիոգրաֆիա (ԷՆՄԳ), էլեկտրաէնցեֆալոգրաֆիա (ԷԷԳ), տեսողական, շարժողական և սոմատոսենսորային հարուցված պոտենցիալների հետազոտություններ, նեյրովեգետատիվ ախտորոշում, գոտկային (լյումբալ) պունկցիա, ինչպես նաև կլման ակտի էնդոսկոպիկ գնահատում։

Սրտաբանական բաժանմունքում հասանելի են էխոսրտագրություն, էլեկտրասրտագրություն (ԷՍԳ), 24 և 48-ժամյա Հոլտեր-մոնիթորինգ, ինչպես նաև զարկերակային ճնշման շուրջօրյա մոնիթորինգ։

Կենտրոնն առանձնահատուկ ուշադրություն է դարձնում նաև հոգեկան առողջությանը։ Այստեղ իրականացվում է վախերի և տագնապային խանգարումների, դեպրեսիայի, քնի խանգարումների, քրոնիկ հոգնածության համախտանիշի, ինչպես նաև սթրեսի հետևանքով առաջացած ֆիզիկական գանգատների ախտորոշում և բուժում։

Նյարդավերականգնողական բաժանմունքում մատուցվում են լոգոպեդիայի, էրգոթերապիայի, վերականգնողաբանի խորհրդատվության, բուժական մերսման, ասեղնաբուժության և մանուալ թերապիայի ծառայություններ, որոնք կարևոր դեր ունեն ինսուլտից, վնասվածքներից և նյարդաբանական տարբեր հիվանդություններից հետո վերականգնման գործընթացում։

Ժամանակակից ուլտրաձայնային ախտորոշման բաժանմունքում իրականացվում են գլխուղեղի և պարանոցի մագիստրալ անոթների դուպլեքս հետազոտություններ, պերիֆերիկ նյարդերի, հոդերի և մկանների սոնոգրաֆիա, ինչպես նաև որովայնի խոռոչի, փոքր կոնքի օրգանների, վահանաձև գեղձի և ստորին վերջույթների անոթների համալիր հետազոտություններ։

NeuroKlinik-ը կառուցվել է երեք կարևոր սկզբունքների վրա՝ գերմանական որակ, անհատական մոտեցում և հասանելի գնային քաղաքականություն։ Կենտրոնի առաքելությունն է յուրաքանչյուր բուժառուին առաջարկել ոչ միայն բարձրակարգ բժշկական ծառայություններ, այլև վստահության, հոգատարության և մասնագիտական համագործակցության վրա հիմնված բուժման միջավայր։

Մեկ ամյակին նվիրված միջոցառումը ևս մեկ անգամ ընդգծեց, որ Հայաստանում բժշկությունն աստիճանաբար համալրվում է միջազգային փորձով աշխատող նոր սերնդի կենտրոններով, իսկ NeuroKlinik-ը հավակնում է դառնալ նյարդաբանության ոլորտի առաջատար հաստատություններից մեկը՝ առաջարկելով համաշխարհային մակարդակի ծառայություններ հենց Երևանում։

Միջոցառմանը ներկա էին անվանի բժիշկներ, առողջապահության ոլորտի ներկայացուցիչներ, քաղաքական գործիչներ, դիվանագետներ, այդ թվում՝ ՀՀ-ում Գերմանիայի Դաշնային Հանրապետության դեսպանության գործերի ժամանակավոր հավատարմատար Լարս Հենիգը։