«Արմենիա Վայն»-ը հյուրընկալեց «Մոնդիալ դե Բրյուսել»-ի շուրջ 450 հյուրերի

Այս տարի Հայաստանը դարձել է գինու աշխարհի ուշադրության կենտրոնը․ Երևանում և հայկական գինեգործական կենտրոններում անցկացվում էր «Concours Mondial de Bruxelles» միջազգային հեղինակավոր մրցույթը, որը հաճախ անվանում են գինու ոլորտի «Օսկար»։ Եթե կինոաշխարհում ամենաբարձր գնահատականը Օսկարն է, երաժշտության ոլորտում՝ Գրեմմին, ապա գինեգործության մեջ նույն հեղինակությունն ու ազդեցությունն ունի հենց «Մոնդիալ Բրյուսել»-ը։ Տասնյակ տարիներ շարունակ այս մրցույթը համարվում է աշխարհի ամենաազդեցիկ և վստահելի գինու գնահատման հարթակներից մեկը։ Պատկերացրեք՝ աշխարհի ամենահայտնի գինու փորձագետները, ժյուրիի անդամները, լրագրողները, արտադրողները և գինեսերները Հայաստանում էին՝ բացահայտելու մեր երկիրը որպես գինու բնօրրան։

«Concours Mondial de Bruxelles» միջազգային մրցույթի հյուրերը՝ ժյուրիներ, լրագրողներ, գիտակներ, արտադրողներ, ներմուծողներ և գինու գիտակներ Արմենիա Վայն գինեգործարանում էին՝ մեկ վայրում ուսումնասիրելու հայկական գինու 6000-ամյալ ժառանգությունն ու հայկական բարձրորակ գինին ու կոնյակը: Ազգային ոգով ողջույնից մինչև Հայաստանի գինու պատմության թանգարան և էթնո-ջազզ կենդանի համերգ՝ ծանոթանալով հայկական մշակույթին, պատմությանը, ավանդույթներին, գինեգործական ժամանակակից տեխնոլոգիաներին, համերին, բույրերին և հայկական հյուրընկալության արվեստին:

«Concours Mondial de Bruxelles»-ը հիմնադրվել է 1994 թվականին Բելգիայում։ Սկզբնական շրջանում այն անցկացվում էր բացառապես Բրյուսելում, սակայն տարիների ընթացքում մրցույթը վերածվեց միջազգային շարժական հարթակի և սկսեց կազմակերպվել աշխարհի տարբեր երկրներում՝ ընդգծելով տվյալ տարածաշրջանի գինեգործական մշակույթն ու ավանդույթները։ Մրցույթին ամեն տարի մասնակցում են հազարավոր գինիներ աշխարհի տարբեր երկրներից։ Դրանք գնահատվում են միջազգային փորձագիտական ժյուրիի կողմից, որի կազմում ընդգրկված են սոմելիեներ, գինու քննադատներ, լրագրողներ, ներմուծողներ և ոլորտի առաջատար մասնագետներ։

Այսօր «Մոնդիալ Բրյուսել»-ը համարվում է աշխարհի ամենախիստ և ամենահեղինակավոր գինու մրցույթներից մեկը։ Գնահատման գործընթացը իրականացվում է կույր համտեսի սկզբունքով, ինչը երաշխավորում է առավելագույն անկողմնակալություն և մասնագիտական ճշգրտություն։ Տարիների ընթացքում մրցույթը հյուրընկալել են գինեգործական հայտնի երկրներ և քաղաքներ՝ France, Spain, Italy, Portugal, Mexico, Croatia և այլ երկրներ։ Իսկ այս տարի այդ շարքում իր արժանի տեղն ունեցավ նաև Հայաստանը։

Մրցույթի անցկացումը Հայաստանում պատահական չէ։ Հայաստանը համարվում է աշխարհի ամենահին գինեգործական կենտրոններից մեկը։ Արենիի քարանձավում հայտնաբերված շուրջ 6100 տարվա գինեգործական համալիրը վաղուց արդեն միջազգային գիտական հանրության կողմից ճանաչվել է որպես աշխարհի ամենահին հայտնի գինեգործարաններից մեկը։ Այսօր հայկական գինեգործությունը նոր վերելք է ապրում․ տեղական խաղողի եզակի տեսակները, ժամանակակից տեխնոլոգիաները և ավանդական մշակույթը հայկական գինին դարձրել են միջազգային շուկաներում ավելի մրցունակ և ճանաչելի։

Այս իրադարձությունը կարևոր հնարավորություն է ոչ միայն հայկական գինին միջազգային հարթակում ներկայացնելու, այլև Հայաստանը որպես գաստրոտուրիզմի և գինու մշակույթի կարևոր ուղղություն ամրապնդելու համար։ «Մոնդիալ Բրյուսել»-ի անցկացումը Հայաստանում ևս մեկ անգամ ցույց է տալիս, որ հայկական գինեգործությունը այսօր արդեն համաշխարհային ուշադրության կենտրոնում է։