Հայկոյին նվիրված հատուկ ընթրիք HAYKO HAKOBYAN FOUNDATION-ի կողմից

Երեկ սիրված երգիչ Հայկոյի ծննդյան օրն էր: Այս առթիվ HAYKO HAKOBYAN FOUNDATION-ը և Karas Wines-ը կազմակերպել էին հատուկ օր՝ Հայկոյի հարազատների, ընկերների և գործընկերների համար: Եվս մեկ հրաշալի օր՝ սիրված երգչին ողջունելու և նրա ստեղծագործությունները վայելելու համար:

Կամո Թովմասյան

Այս տարի Հայկոն կնշեր իր 51-ամյակը, մինչդեռ շատերիս համար իրոք դեռ անհավատալի է, որ նա այլևս մեզ հետ չէ: Մեզ հետ են սակայն հիշողությունները, նրա երգերը և մարդիկ, ովքեր կարող են անդադար պատմել Հայկոյի հետ ունեցած հետաքրքիր միջադեպերի մասին: Հյուրերը նախ այցելեցին Երևանի քաղաքային պանթեոն, որից հետո ուղևորվեցին «Կարասի» գինու այգիներ եւ գործարան: Ընթրիքին ներկա էին Հայկոյի հարազատները՝ ի դեմս որդու, մտերիմ ընկերները՝ Սիրուշոն և Լևոն Քոչարյանը, Ավետ Բարսեղյանը, Սոֆի Մխեյանը, Գրիշա Աղախանյանը, Արամեն և Աննա Թովմասյանը, Հրաչ Քեշիշյանը, Գագա և Նառա Ամատունիները և այլք:

Ներկա էինք նաև մենք՝ մի քանի գործընկերներ, ովքեր համագործակցել են Հայկոյի հետ: Ողջ երեկոյի ընթացքում կենդանի կատարումներով բեմում էին Վահե Մարգարյանը, Մովսես Մովսիսյանը և Rootline բենդը՝ իհարկե Հայկոյի ստեղծագործություններով: Ի դեպ, վերջիններս երաժշտական շրագիրը կազմել էին հենց հատուկ այս երեկոյի համար: