Թաթան և Լյուբա Ուսպենսկայան «Էրեբունի-Երևան 2807» տոնական օրվա ամփոփմանը

Եկե՛ք անկեղծ լինենք՝ այս տարի Երևանի քաղաքապետարանը նույնիսկ նախորդ տարվանից էլ ավելի լավ էր պատրաստվել քաղաքի տոնին։ Ամբողջ օրը մայրաքաղաքում տեղի էին ունենում տարբեր ակտիվություններ՝ համերգներ, փոքր փառատոններ, ցուցադրություններ։ Քաղաքը բառացիորեն շնչում էր տոնական տրամադրությամբ։ Իսկ այն, ինչ մեզ սպասվում էր Հանրապետության հրապարակում, ուղղակի բառերով հնարավոր չէ փոխանցել։ Պետք է պարզապես այնտեղ լինեիք՝ զգայիք այդ էներգիան, այդ վայբը, որն ուներ յուրահատուկ երևանյան շունչ։

Կամո Թովմասյան

Երևանի քաղաքապետարանը նախապես մեծ նախապատրաստական աշխատանքներ էր իրականացրել՝ ապահովելու համար, որ «Էրեբունի-Երևան 2807» տոնակատարությունը անցնի բարձր մակարդակով։ Տոնի նախօրեին քաղաքում իրականացվել էին մի շարք բարեկարգման և ձևավորման աշխատանքներ․ զարդարվել էին գլխավոր պողոտաներն ու հրապարակները, տեղադրվել էին տոնական լուսավորություններ, իսկ տարբեր համայնքներում կազմակերպվել էին մշակութային ու մարզական միջոցառումներ։

Հատուկ շնորհակալություն Արմենիա Մարիոթ հյուրանոցին՝ ես նկարահանում էի նրանք 6-րդ հարկից, որպեսզի ավելի պատկերավոր կոնտենտ ստանայինք:

Տոնական միջոցառումների ամփոփումը Հանրապետության հրապարակում էր, որտեղ երեկոյան կայացավ մեծ համերգ-շոու՝ Երևանի 2807-ամյակին նվիրված։ Համերգի գլխավոր հերոսը Թաթա Սիմոնյանն էր, ով հանդիսատեսին ներկայացրեց իր լավագույն երգերը՝ ստեղծելով ջերմ ու հայրենասիրական մթնոլորտ։ Վերջին երգերն արդեն անձրևի տակ էր կատարում, իսկ ամբոխը չէր էլ պատրաստվում հեռանալ: Այս տարի անհավանական շատ էին մարդիկ, ինչն ապացուցում է Թաթայի հանդեպ աննկարագրելի սերը: 17 սիրված հիթեր՝ ներառյալ երկու զուգերք:

Բեմում էին Կարեն/Սևակ բենդը, SWAG պարային խումբը:

Համերգի գլխավոր անակնկալը դարձավ երգչուհի Լյուբա Ուսպենսկայայի մասնակցությունը, ով հատուկ ժամանել էր Երևան՝ մասնակցելու տոնակատարությանը։ Թաթան և Ուսպենսկայան միասին ներկայացրին երկու գեղեցիկ դուետ։ Բացի այդ, Լյուբա Ուսպենսկայան առաջին անգամ ներկայացրեց իր նոր երգը, նվիրված Երևանին, որը ստեղծվել էր հատուկ այս տոնի համար։

Երգը լի էր սիրով և ջերմությամբ՝ ընդգծելով Երևանի հին ու նոր շունչը, նրա մշակութային բազմազանությունն ու մարդկանց հյուրընկալ բնույթը։

Տոնական երեկոն ավարտվեց շքեղ հրավառությամբ, որը ամփոփեց քաղաքի 2807-ամյակի միջոցառումները՝ ստեղծելով անզուգական տոնական տրամադրություն ինչպես երևանցիների, այնպես էլ հյուրերի համար։