ԳԱԳԻԿ ՀԱՐՈՒԹՅՈՒՆՅԱՆԻ անհատական ցուցահանդեսը և հեղինակած գրքի շնորհանդեսը

Գագիկ Հարությունյանն իր ստեղծագործական ուղին սկսել է 2000-ականների սկզբին: Հիմնական ժանրերն են՝ դիմանկարն ու բնանկարը: Արդեն 2012թ. սկսած լուսանկարչի գլխավոր թեման դառնում է նորաձևությունը: Լուսանկարիչը հիմնականում լուսանկարում է մարդկանց՝ ֆիքսելով նրանց հուզական ներաշխարհը, էմոցիաները` ձգտելով պատկերել իրականությունը, և հենց դա է պատճառը, որ Գագիկ Հարությունյանի լուսանկարների գլխավոր հերոսը մարդն է:

Գրքում հրատարակված լուսանկարները Գագիկի երկար տարիների հեղինակած աշխատանքներն են: Կարծես ամփոփելով նրանց մեկ տեղում՝ ներկայացվում է հանրությանը և լուսանկարչի արվեստը սիրող մարդկանց։ Ինչո՞ւ սև և սպիտակ հիշողություններ․ «Ես՝ որպես լուսանկարիչ, խորապես սիրահարված եմ սև ու սպիտակ լուսանկարչությանը։ Գրքում տպագրված լուսանկարների գերակշիռ մասը սև ու սպիտակով են արված», նշում է լուսանկարիչը և հավելում. «Իմ աշխատանքներից՝ գույներով արված լուսանկարներ,նույնպես ներառված են գրքում: Ինչո՞ւ մեծամասամբ սև ու սպիտակ, որովհետև սև ու սպիտակը լուսանկարչության գույներն են: Լուսանկարչության ստեղծումը՝ սկզբնաղբյուրը, եղել է առանց գույների,որը մշտապես ուղղորդել է մարդկությանը մինչև մեր օրերը: Երեկ արված լուսանկարը կարող է թվալ, որ այն շատ հին ժամանակներից է,և այս առեղծվածը՝ տարիքը որոշելու դժվարությունը, նրան լրացուցիչ հմայք է հաղորդում: Ահա թե ինչն է պատճառը, որ խորապես սիրահարված եմ սև ու սպիտակ լուսանկարչությանը»:

Գրքում հրապարակված լուսանկարները հիմնականում արված են նորաձևություն, արտ և բյութի ժանրերում: Լինելով բնական գեղեցկության կողմնակից՝ լուսանկարներում ամբողջությամբ պահպանված է բնականը՝ բնական գեղեցկությունը․դրանք իրենց մեջ պարունակում են համակարգչային ծրագրի չնչին միջամտություն, առանց արհեստական ավելորդությունների:

Լուսանկարիչն անդրադարձել է լուսանկարչությանը վերաբերող սյուժեներին՝ արվեստ, լուսանկարչություն, արվեստի և սիրո կապը, արվեստ և փիլիսոփայություն, նորաձևության լուսանկարչություն և այլն: Գրքում կհանդիպեք լուսանկարների, որոնք ցուցադրվել են եվրոպական մի շարք պատկերասրահներում և ճանաչվել լավագույնը: Կարծում եմ, այնտեղ կգտնեք ձեզ հետաքրքրող թեմաներ և լուսանկարներ։ Գիրքը կարող եք ձեռք բերել երևանի լավագույն գրախանութների ցանցերից՝ «Բուկինիստ», «Զանգակ», «Էպիգրաֆ» և Գագիկի ինսթագրամի էջից՝ կապ հաստատելով հեղինակի հետ։

Խոսելով լուսանկարչի ստեղծագործական ոճի մասին՝ հարկ է նշել, որ իր բոլոր աշխատանքներում ձգտում է ռեալիզմի։ Հիմնականում լուսանկարում է սև ու սպիտակ ոճով: Մոդելների հետ աշխատելիս լուսանկարչի համար սկզբունքային է,որ նրանք լինեն առանց դիմահարդարման: Լուսանկարները մշակելիս կողմնակից չէ մեծ փոփոխությունների, քանի որ միշտ ձգտում է ստանալ բնական կերպարներ։ Գագիկը նորաձևության ճանաչված լուսանկարիչներից մեկն է Հայաստանում: Նա նպաստել է Հայաստանում նորաձևության և գեղեցկության առաջատար տների հաջողությաններին՝ ստեղծելով կերպարներ, պատկերներ շատ ապրանքանիշների համար: Նրա լուսանկարները տպագրվել են մի շարք ամսագրերում, ինչպիսիք են՝ «EL Style»-ը, «Luxury»-ն: Համագործակցել է Հայաստանում մոդելների, դերասանների, երգչուհիների, արտիստների հետ: Գագիկ Հարությունյանի աշխատանքները ցուցադրվել են եվրոպական մի շարք երկրների պատկերասրահներում, ինչպիսիք են՝Corso como Milan-Carla Sozzani Gallery (Իտալիա), Gallery Sakora (ֆրանսիա):

Մասնակցել է մի շարք ցուցահանդեսների՝ կազմակերպված «Vogue Italia»-ի կողմից: Գագիկ Հարությունյանի լուսանկարներից մեկը «Vogue Italia» խմբագրության կողմից համեմատվել է հռչակավոր ֆիլմերի հետ և ճանաչվել է օրվա լավագույն լուսանկար ու ցուցադրվել իտալական VOGUE-ում։ Մի շարք այլ լուսանկարներ նույնպես ընտրվել և հաստատվել են որպես լավագույն լուսանկարներ անվանակարգում։