GAYA x BMS համատեղ ցուցադրությունն ու հյուրերը

Շնորհավորում եմ իմ սիրելի ընկերուհի Գայային՝ գեղեցիկ ցուցադրության առթիվ։ Նրա GAYA բրենդը, BMS Models նորաստեղծ մոդելային գործակալության հետ համատեղ, Հայ Արտ կենտրոնում ներկայացրեց կապսուլային հավաքածու, որով նաև ազդարարվեց BMS Models մոդելային գործակալության մեկնարկը։

Հայկ Շաբանյան
Կամո Թովմասյան

Սիրում եմ, երբ ընկերներս նպատակասլաց են, աշխատասեր, և ես էլ հնարավորություն եմ ունենում շեշտելու նրանց ձեռքբերումները։ Գիտեք, ես առհասարակ միշտ ոգեշնչվել եմ հենց իմ աշխատասեր ընկերներից, իսկ Գայան դրա հրաշալի օրինակն է։

Տարիներ առաջ, երբ ծանոթացել ենք, նա ոճային ռիլեր էր նկարում, համագործակցում տարբեր ընկերությունների հետ, իսկ հետո մեկ էլ նկատեցի, որ Գայան սկսել է արտադրել իր հագուստի շարքը, մասնակցում է Երևանի նորաձևության շաբաթին, ունենում է ցուցադրություն Մոսկվայում։ Նկատեցի նաև շատ հայտնի անձանց, ովքեր կրում են Գայայի հագուստները։ Այս ամենը ինքնավստահ ու աշխատասեր աղջկա ճանապարհի ապացույցն է, ով նաև կարողանում է ոլորտում ճիշտ հարաբերություններ կառուցել, ինչը ոչ պակաս կարևոր է։

Նրա նոր՝ կապսուլային հավաքածուն, հստակ ձևերի ու գույների մասին է։Հավաքածուն առավել կոնկրետ է իր կառուցվածքով՝ հստակ գծերով, ձևերի ճշգրտությամբ ու արտահայտիչ սիլուետներով։ Աշխատանք է տարվել նաև գործվածքների հակադրությունների վրա՝ փորձելով նոր համադրություններ ու լուծումներ։ Կային նաև մի քանի փորձարարական մոտեցումներ, որոնք գուցե վիճելի էին, բայց միանշանակ հետաքրքիր։ Վայրը՝ Հայ Արտ մշակութային կենտրոնն էր, հյուրերը՝ ոլորտի հայտնի ներկայացուցիչներ, գործընկերներ և արդեն հավատարիմ այցելուներ։