Բարեգործական Գալա ընթրիք «Երևանյան Գաստրոնոմիկ Օրեր» փառատոնի շրջանակներում

Դիլիջանի «ԻՄ ՏՈՒՆ» ռեստորանում կայացավ հատուկ բարեգործական Գալա Ընթրիք։ Երեկոյի ճաշացանկի հեղինակը ֆրանսահայ խոհարար, 2 Միշլենյան աստղ կրող Ալեն Ալեքսանյանն էր, ում գլխավորությամբ հյուրերին մատուցվեցին 5 հեղինակային ճաշատեսակներ՝ ոգեշնչված Դիլիջանի բնությամբ և հիմքում ունենալով հայկական անուշահամ բաղադրիչները։

ARARAT հայկական կոնյակները՝ լինելով ընթրիքի հատուկ գործընկերը, բացման արարողության համար պատրաստել էր ընդունելության հյուրասիրություն՝ հեղինակային կոկտեյլներով։

Ճաշատեսակների հետ համադրված էին Yacoubian-Hobbs կարմիր և սպիտակ գինիները, ինչպես նաև ARARAT հայկական կոնյակները։ Երեկոյի ընթացում հնչում էր կենդանի էթնո-ֆոլկ երաժշտություն՝ Ակնա բենդի կատարմամբ։

Երեկոն նվիրված էր Հայաստանում ժամանակակից գաստրոնոմիայի հիմնադիրներից՝ Ժիրայր Ավանյանին, ով նպատակ ուներ «ԻՄ ՏՈՒՆ» ռեստորանում հյուրընկալել միջազգային փորձառու խոհարարների և նրանց փորձը կիսել տեղի խոհարարական համայնքի հետ։ Շարունակելով պարոն Ավանյանի գործը՝ այս բարեգործական ընթրիքի հասույթը փոխանցվելու է Ֆրանս-Հայկական Մասնագիտական Ուսումնական Կենտրոնի նվազագույնը 4 երիտասարդ խոհարարների 3 տարիների ուսման վճարի փոխհատուցմանը՝ սրանով իսկ քայլ կատարելով Հայաստանում գաստրոնոմիայի հիմքերի ամրապնդմանը։

Բարեգործական հանգանակություններից զատ երեկոյի ընթացքում տեղի ունեցան նաև աճուրդներ։ Պարոն Ավանյանի անձնական հավաքածուից աճուրդի հանվեցին և վաճառվեցին կտավ և կարպետ։
Երեկոյի գլխավոր պահերից էր նաև շեֆ-խոհարար Ալեն Ալեքսանյանի նշանավոր նարնջագույն խոհարարական բաճկոնի աճուրդը, որը մեծ ոգևորություն առաջացրեց ինչպես հյուրերի, այնպես էլ հենց շեֆ-խոհարարի մոտ։