Հայ ոճաբանների հաղթանակը ամենամյա OMC Hairworld 2024-ում

Փորձեմ բացատրել թե ինչ է OMC Hairworld-ը, որը վերջերս տեղի ունեցավ Փարիզում, ինչպես են մասնակցել այս մրցույթին հայ ոճաբանները, ովքեր են հաղթել և ինչու են այս առաջնությանն անվանում Բյութի ոլորտի Օլիմպիական խաղեր: Այո մերոնք մեծ հաղթանակներով են վերադարձել Հայաստան և ես՝ մոտ երկու տասնամյակ ներկայացնելով բյութի և նորաձևության ոլորտը, իհարկե չէի կարող չանդրադառնալ հայերի հաղթանակին:

Կամո Թովմասյան

OMC-ն (Organisation Mondiale Coiffure) ամբողջ աշխարհում վարսահարդարներին և դիմահարդարներին միավորելու, ստեղծագործական, ուսուցման և մասնագիտական աճին նպաստելու մասին է: Առաքելությունն է բարձրացնել մասնագիտությունը, ընդլայնել OMC-ի ներկայությունը աշխարհում և ապահովել անզուգական կրթության, վերապատրաստման և հավաստագրման ծրագրեր: Ընկերությունը կազմակերպում է ամենամյա հեղինակավոր OMC HAIRWORLD-ը` գեղեցկության աշխարհի առաջնությունը, որը համարում են բյութի ոլորտի Օլիմպիական խաղեր: Ընկերությունն ունի 78 տարվա պատմություն, յուրաքանչյուր տարի այս առաջնությունը տեղի է ունենում տարբեր երկրներում, այս տարի դա Ֆրանսիան էր:

Ավելի քան 60 երկրների մասնագետներ էին մասնակցում էին այս առաջնությունում: Մոտ երկու տասնյակ անվանակարգերում մրցում էին 70-80 մասնագետներ, ինչը բավական բարդ և պատասխանատու էր դարձնում մասնակցությունը: Անվանակարգերում ներկայացված էին ամենօրյա, դասական, տոնական սանրվածք, դիմահարդարում, նեյլ դիզայն և բյութի ոլորտի այլ ճյուղեր: Մեր պատվիրակությունը ներառում էր մոտ 60 մասնակից բոլոր այս անվանակարգերում: Առաջնությունը տեղի էր ունենում Փարիզում՝ հոկտեմբերի 12-14-ը: