ՓԱՅԼՈՈՒ ամանորյա մյուզիքլի պրեմիերան և հյուրերը

Արդեն լսել եք չէ՞ ՓԱՅԼՈՈՒ ամանորյա ընտանեկան մյուզիքլի մասին: Այս բոլորովին նոր և ինքնատիպ մյուզիքլը ստեղծվել է բազմաթիվ տաղանդավոր մասնագետների համատեղ աշխատանքի արդյունքում: Մտահղացման հեղինակներն իմ սիրելի ընկերներն են՝ Ռուդիկ Տեր-Գալստյանը, Գրիգոր Կյոկչյանը և Հովհաննես Սարգսյանը: Սցենարը, զգեստները, երաժշտությունը (ի դեպ, կենդանի կատարմամբ), խորեոգրաֆիան, ամեն ինչ ստեղծված և ձևավորված է Factory Production երազողների թիմի կողմից:

Մյուզիքլի հիմնական գաղափարն այն է, որ ամեն ինչի հիմքը պարզ մարդկային երևակայությունն է: Պարզապես պետք է հավատալ, լինել համարձակ և երբեք չդադարել երազել: Տարվա ամենասպասված իրադարձություններից մեկը Հ.Պարոնյանի անվան երաժշտական կոմեդիայի պետական թատրոնում ցուցադրվելու է դեկտեմբերի 16-ից հունվարի 14-ը:

Պատկերացրեք մի դպրոց, որտեղ արգելված է երազել: Թվում է, թե անհնար է դա արգելել: Բայց դպրոցի տնօրեն Մս․ Չարիսը իր օգնական Մռայլոուի հետ կարողանում է հատուկ սարքի միջոցով հայտնաբերել ցանկացած երազանք, որը ծնվում է երեխաների մտքում և սրտում: Դպրոցի աշակերտներից մեկը՝ տասնամյա Ալեքսը, Ամանորի նախօրեին տեղեկանում է, որ ինքը չի կարող գնալ տուն, որովհետև իր ծնողները չեն հասցնում գալ իր հետևից ձնաբքի պատճառով, և ամանորին ինքը չի կարող լինել տանը։

Չեմ ուզում բացել բոլոր գաղտնիքները, կարծում եմ Ձեզ հետաքրքիր կլինի անձամբ այցելել և հետևել ընթացքին: Մյուզիքլի ուզերձը պարզ մարդկային երազանքն է. պետք է հավատալ, լինել համարձակ և ոչ մի դեպքում չդադարել երազել:

Բեմադրող ռեժիսոր՝ Նաիրե Ստեփանյան, երկրորդ ռեժիսոր՝ Լիգիա Վարդանյան, դերերում՝ Արսեն Գրիգորյան, Ռոբերտ Խաչատրյան, Ալեքս Մակարյան, Աննա Լառայ, Գևորգ Դավթյան: Կոմպոզիտոր՝ Լիլիթ Նավասարդյան, լիբերտո՝ Գրիգոր Կյոկչյան, ձայնագրում և միքսում՝ Սերգեյ Հովհաննիսյան: Մեբադրող խոերոգրաֆ՝ Հովհաննես Սարգսյան, սցենարի հեղինակ՝ Աշոտ Աբրահամյան, սցենոգրաֆիա՝ Մկրտիչ Շեխյան:

Զգեստների դիզայներ՝ Արամ Նիկոլյան, դեկորացիաների արտադրություն՝ STAGE STYLE DESIGN, վիզուալ հաղորդագրության մասնագետ՝ Դավիթ Փարթամյան: Ձայնային ձևավորում՝ Տիգրան Կուզիկյան, վիզուալ էֆֆեկտներ՝ ՖՐԱԳՄԵՆՏ ՓՐՈԴԱԿՇՆ: Արտադրության ղեկավար՝ Արթուր Ջուլհակյան, գծային պրոդյուսեր՝ Անուշ Վարդանյան, երաժշտական պրոդյուսեր՝ Գրիգոր Կյոկչյան: Գլխավոր պրոդյուսեր՝ Ռուդիկ Տեր-Գալստյան:

Տոմսեր կարող եք ձեռք բերել tomsarkgh.am և fastticket.am կայքերից:

Շտապեք երազանքի հետևից ….