«Երևանի քաղաքապետի գավաթ» մրցաշարի եզրափակիչ խաղերը

Ավարտվեց «Երևանի քաղաքապետի գավաթ» միջազգային երկրորդ մրցաշարԸ: Այն կազմակերպվել էր միջազգային ֆեդերացիաների հետ համագործակցությամբ և ընթանում էր միջազգային սահմանված կանոնակարգերով:

Կամո Թովմասյան

«Երևանի քաղաքապետի գավաթ» միջազգային մրցաշարի վերջին խաղերն այսօր էին: Սեղանի թենիսի մրցումներին մասնակցում էին Հայաստանի, Վրաստանի, Ռուսաստանի, ԱՄԷ-ի և Իտալիայի մարզիկները: Եզրափակիչ խաղերին ներկա էր Երևանի քաղաքապետ՝ Տիգրան Ավինյանը:

Սեղանի թենիսի մրցումներին թե տղաների և թե աղջիկների մրցաշարում նույն արդյունքը գրանցվեց: Առաջին երկու հորիզոնականներում Ռուսաստանի մարզիկներն էին, իսկ երրորդ տեղում մեր մարզիկներն են:

«Երևանի քաղաքապետի գավաթ» միջազգային մրցաշարի բասկետբոլի եզրափակիչ խաղերի արդյունքում Երևանի թիմը երրորդ հորիզոնականում է՝ բրոնզե մեդալով, Թբիլիսիի «Վինքս» թիմը արծաթե մեդալակիրն է, իսկ առաջինը Չելյաբինսկի «Չելբասկետ» թիմն է, որին ոսկե գավաթն էլ փոխանցեց Երևանի փոխքաղաքապետ Արմեն Փամբուխչյանը։ Վոլեյբոլի մրցումներում երրորդ հորիզոնականում կրկին երևանյան թիմն էր, երկրորդ և առաջին հորիզոնականներում՝ Բելառուսի թիմերն էին։

Միջազգային ֆեդերացիաների հետ համագործակցությամբ կազմակերպված «Երևանի քաղաքապետի գավաթ» մրցաշարը շարունակական է լինելու, որի շնորհիվ երևանյան հավաքականները հնարավորություն կունենան առավել լավ մարզավիճակում ներկայանալ նաև աշխարհին։ Երևանի քաղաքապետարանն ամեն ինչ անելու է, որ փորձի փոխանակման տեսակետից ապագայում ևս մեր հավաքականները մեծ հնարավորություններ ունենան։