lifestyle

 Սարյանը հայտնի է նոր սերնդի գինետներով, տիպիկ հայկական ճոխ ռեստորաններով և միշտ մարդաշատ վայբով, բայց այ Ground Zero-ն այլ իրականություն դարձավ փողոցում: Արտերկրում հաճախ ենք հանդիպել այս կոնցեպտին, բայց տարածաշրջանում այն առաջինն էր: Մինիմալիստական ինտերիեր, pet friendly սրճարան, ներսում գործող shop, որտեղ ներկայացված են հայ արտադրողների պրոդուկտները, հիմնականում ինքնասպասարկում. այն, ինչ մի քանի տարի առաջ չէր կարող աշխատել մեր քաղաքում, հիմա նոր տրենդ է դարձել ու այսօրվա երիտասարդությունը կարծես ընտրում է հենց այս ձևաչափը: 

Ground Zero-ն կարծես Սիլկոնյան հովտի երևանյան վայբը փոխանցի: Յուրահատուկ սուրճեր, դիետիկ սնունդ և հաց, դետոքս ըմպելիքներ, որոնք հարմար է նաև հետդ վերցնելու համար: Առավոտյան 08.00-ից մինչ 15.00 կարող ես պատվիրել նախաճաշ, իսկ մինչ կեսգիշեր էլ փակ և բացօթյա սրահներում աշխատել, սնվել, ժամանակ առ ժամանակ նաև մասնակցել հետաքրքիր հանդիպումների: Ներսում կարող եք գտնել նաև հայ արտադրողի աշխատանքը՝ TUMO-ի հետ համատեղ թողարկված սպասքից մինչ Sona's գինիները, որը Սոնա Աբրահամյանի նախաձեռնությունն է: Սա պարզապես սրճարան չէ, այլ "ապրելավայր"՝ վայբ, որով կազմում ես քո առօրյան:

Ground Zero-ն նաև հանդիպումների, public talk-երի, շնորհանդեսների ալտերնատիվ հարթակ է, ու այս շաբաթվա Breakfast Series-ի հյուրը Երևանի փոխքաղաքապետ Տիգրան Ավինյանն էր: Անոնսում նշված էր՝ ոչ մի քաղաքական հարց,   զրուցում ենք էկոլոգիայի, բնապահպանության, նոր տեխնոլոգիաների մասին: Ինձ դուրեկավ Making the city business friendly ուղերձը, սա ամբողջությամբ իմ թեման է և իմ աշխատանքի բնույթը. մաքսիմալ ճիշտ ներկայացնել Երևանը՝ երևանցիների և հյուրերի համար:

Մինչ հանդիպմանն անցնելը նշեմ, թե այստեղ ինչ եմ խորհուրդ տալիս պատվիրել նախաճաշին: Ընտրում եմ գերմանական նախաճաշ, աղցաններից՝ թունայով աղցանը, շատ համեղ են իրենց կրուասանները, նաև նախընտրում եմ դեկաֆ սուրճ: փորձեք նաև դիետիկ բատոնները և մի մոռացեք հետևել կալորիաններին, որոնք գրված են տուփերի վրա: Ի դեպ, առաքման դեպքում հաճախ գործում են ակցիաներ և զեղչային տարբերակներ, օրինակ այսօր Glovo-ից առաքում պատվիրելու դեպքում գործում էր ակցիան՝ վճարելով մեկ նախաճաշի համար ստանում էիր 2-ը:

Եթե Ձեզ հետաքրքիր է, կարող եք միանալ Ground Zero-ի էջին և հետևել մյուս հանդիպումներին, դրանք պարբերաբար անցկացվում են շաբաթվա տարբեր օրերին. շատ լավ մարքեթինգային քայլ էր, ի դեպ: Կարծում եմ վաղ առավոտյան 09.00-ին կազմակերպված հանդիպումը շատերի համար ուսուցողական էր, ինֆորմատիվ և մենք ավելի մտերմիկ միջավայրում կարողացանք ուղղել մեր հարցերը կապված ԱՊԱԳԱ Երևանի հետ:

Breakfast-ին ներկա էին տարբեր ոլորտներ ներկայացնող, հիմնականում 20-50 տարեկան անձինք: Մեր ռեպորտաժում կարող եք հետևել, թե ինչպես անցավ հանդիպումը և լսել մի քանի ուղղված հարցերի պատասխաններ: Իհարկե քննարկվեց նորակառույցների, կանաչապատման, նույնիսկ երեկոյան ժամերին մեքենաների միջից բարձր երաժշտություն հնչելու խնդիրը: Ես պատմեցի մեր շենքի բնակիչների կողմից սեփական ուժերով և ֆինանսներով մեր մուտքն ամբողջությամբ վերանորոգելու մասին, ինչին պատասխան Պրն. Ավինյանն էլ նշեց, որ շուտով կփոխվեն Երևանի տարբեր համայնքների վերելակները: Ավելին դիտեք մեր ռեպորտաժում: